ZPM Southern Headquarters Lunglei chuan an vawiinah khan chhung inkhawm leh political session hun hmangin, ZPM sawrkarah chuan mipuiin thil theih loh nia an lo ngaih tawh thil tam tak chu thil theih a nihna a lang chhuak mek niin an sawi.
Lalramliana, MLA, ZPM Southern Headquarters, Lunglei President chuan thu sawiin, “ZPM sawrkar chuan term chanve kan hmang liam ta mek a, kan hma lamah MLA inthlanpui kan hmachhawn mek a, ZPM Southern Headquarters hian MLA bial 7 kan huam chinah MLA bial 5 ah hnehna kan la a, bial hniha tuna MLA kan neih lohna thleng hian MLA bial 7 hi la vek thei turin kan hotuten tan an la chho mek a. Ruling MLA kan neih meknaah hian tling chhunzawm leh ngei turin kan MLA te kan beisei a, eng emaw thil awm thut leh thleng a awm loh chuan he an bial hloh thei tur hian party dang candidate chutianga hnehna rawn chang tur sawi tur an awm lo,” a ti.
President, ZPM Southern Headquarters Lunglei Lalramliana chuan, “Mipuiten thil theih loha kan ngaih hial tawh leh dan ang maia ngaihna kan lo neih tawh thil tam tak ZPM sawrkarah hian thil theih a nihna a lo lang mek zel a, ZPM sawrkar laka mipuiten beiseina an neih chu a taka lo thlengin thil theih loh nia kan hriat chu thil theih niin a lo hlawhtling chho ta mek a ni. Chung zingah chuan kawngpui tha neih mipuiin kan duh a, kan hotuten theih tawp an chhuah a, mi thenkhat ten ZPM sawrkar hian an thei leh chuang lo ang min ti a, mahse kawng tha nei turin PWD Minister leh a puitu Mahlima MLA ten hma an la a, hemi kawngah hian ZPM Southern Headquarters hruaitute pawhin theih tawp kan chhuah zel dawn,” a ti bawk.
“Zirna kawnga chhim lam kan tlak hniamnaah ZPM sawrkar ang leh Lunglei lam MLA kan nihna angin theih tawp chhuah a ni. Zirna lama kan tlakhniamna Lunglei NGO leh zirlai pawl te leh mi tam tak veina kawngah Lungleiah Mizoram State University a awm theih nan hma lak a ni a, a hlawhtlinna kan hmuin a puitlin chhoh zelna atan theih tawp chhuah zel a ni a. Zirna in sang Lungleia awm thei tawh lo tura kan ngaih kha he kan sawrkarah hian kalpui a ni chho leh ta mek a ni,” tiin Lalramliana chuan a sawi.
A sawi zelnaah, “ZPM sawrkarah hian hmasawnna hnathawh thil tam tak a awm a, heng zingah hian thil lawmawm ber nia ka hriat zingah thinlung dik put kawnga hmasawnna mipuia lo awm ta mek hi a ni. Tu te emaw kan sawi chhiatna lam ni loin hun kal tawhah sawrkar hna lak leh thil dangah thil dik lo deuh pawh a nih dan tur anga ngaih hial ni thin tawh leh kan ram kal dan leh inrelbawlna dan a nih hial avanga mipui lam pawhin tih danglam theih loh hiala ngaihdan an neih tawh thin ruling party mi leh sa nih ngai leh thil tithei nih ngai thin chu ZPM sawrkarah chuan a awm tawh lo a. A tlak leh tling te chu dik takin hnaah lak an ni tawh a, thil theih loh nia kan ngaih tawh kha thil theih a nihna lantirin a lo awm ta a ni,” a ti.
