Mizoram Pradesh Congress Committee (MPCC) Vice President John Siamkunga, Ex-MLA chuan ZPM sawrkarin hydel project 7 an hralh niin a sawi a. SASCI sum cheng vbc 344 an tih lapse thu a sawiin, MNF sawrkarin an hralh hman tak loh Lengpui chu ZPM sawrkarin an hralh niin a sawi.
John Siamkunga chuan vawiina Mizoram Pradesh Congress Committee political session-ah heng thu hi sawiin, "Mizoram budget pharh a nih khan kan Chief Minister leh Finance Minister ni bawk hian SASCI atanga sum hmuh beisei vbc 1000 a dah a, central lam chuan SASCI-ah vbc 100 chiah an earmark a, vbc 900 in a indaih lo. Hetiang dinhmuna kan dinna chhan chu ZPM sawrkar sum enkawl dan dik loh vang vek a ni a, khu lam mawhpuh chi a ni lo," a ti.
“Kum 2023-24 ah SASCI sum vbc 233 an ti lapse a, a kum lehah vbc 111 an ti lapse leh a, a vaia an tih lapse hi vbc 344 a tling a. Hei hian BJP te tlawn ngaiah a siam tawh,” tiin John Siamkunga chuan a sawi bawk.
MPCC Vice President chuan Lengpui Airport bul ram chu MNF sawrkarin theihtawpa hralh tumin an bei a, an hralh hman lo tih sawiin, ZPM-in an hralh ta a ni a ti a. ZPM sawrkarin Hydel Project 7 an hralh thu leh a la pawi dawn chauh thu a sawi bawk a. “Kum nga chhunga Hydel leh Solar Power a intodelh min tiamtute hian an tihlawhtling em? Ram mipui bumah pawh hian chin tawk nei ang u,” a ti.
