Mizoram Pradesh Congress Committee chuan niminah khan Serchhip khawpuiah 'Vote Humhim La, Ram Chhanhim Rawh' campaign an nei a, MPCC President Lal Thanzara'n hmanpuiin, 'Serchhip bial mipuite chungah a u, Lal Thanhawla tum 7 ngawt an lo thlan tlin tawh avangin chhungkaw aiawhin lawmthu a sawi.
Lal Thanzara chuan India ramah Hindu lal rama siam tum BJP leh an thurualpui RSS ten kum 12 chhung rorelna an chang mek tih sawiin, India thalaite-ah beidawnna nasa tak an thlen mek a ni a ti a. BJP leh RSS te chu Election Commission hmanga voter vaibelchhe 13 chuang Electoral Roll atanga paih mekah puhin, "He thil bawlhhlawh tak titawp tur hian Rahul Gandhi hoin Congress party chuan nasa takin kan dodal mek a. BJP hmanrua CEC Gayanesh Kumar hi a ban hma loh chu kan nawr zel dawn a ni," a ti.
India Parliament inthlanpui neih tur kum 2029 ah Rahul Gandhi chu PM ni turin mi tam takin an ring ber tawh tih a sawi a. BJP do turin INDIA Block support turin mipuite a sawm bawk a. “Vawiina Mizorama sawrkar mek leh Serchhip bialtu MLA CM ni bawk hian BJP a sawi mawiin thawhpui a tum mek niin kan hria,” a ti bawk.
Zodintluanga, National Executive Member, Adivasi Congress leh Vice President, MPCC pawhin thu sawiin, Mizorama MLA inthlanpui neiha kum tawpa 8 a awm apiangin Serchhip bialtu MLA, CM ni bawk an tla ziah tih sawiin, "Kum 2028 ah tu nge tla dawn?" a ti a. ZPM sawrkar chu ZNP sawrkar tiin thlak a ni mek tih sawiin, ZPM sawrkar nana thawh hlawk em em te ZNP sawrkarah an beidawng mek a ti bawk.
