Mizo National Front (MNF) chuan vawiinah khan Mizo Hnam Runah chhung inkhawm an nei a, J. Malsawmzuala Vanchhawng, General Secretary chuan thu sawiin ZPM sawrkarin RTI Act an rap bet nasa niin a sawi.
J. Malsawmzuala Vanchhawng chuan, “ZPM sawrkar hian mipuiin thudik leh lang tlang an hriat theihna tura duan RTI Act an rap bet nasa a, an hmang sual nasa hle a, a pawi tak zet a ni. Hetiang zela sawrkar a kal a, an insiam that loh chuan ram tan a pawi hle dawn a. MNF pawhin mipuite chanvo leh dikna humhalh turin a tawp thlengin kan bei zel dawn a ni," a ti.
MNF General Secretary chuan, "Democracy dik tak awmna ramah chuan sawrkarin mipuite lakah thup ruk an nei ten tun ngai lo a. Sawrkar lang tlang awmin, khua leh tui ten an hriat duh an hre zung zung thei thin a. Chu chu thil dik lo leh corruption dona atan pawh a pawimawh em em a ni. Tuna ZPM sawrkarah erawh chuan sawrkarin thup duh a ngah ta hle mai a, CM leh Minister ten RTI zawhna an en ve duh ta zel a. Thup duh an ngah ta em em hi a serious hle a ni. Hei hi ram tan a pawi tak zet a ni," a ti bawk.
"India ramah RTI Act 2005 kan nei a. He dan hmang hian khua leh tui ten sawrkar kal dan hre ve turin zalenna thui tak kan nei a ni. He dan, mipuiin tangkai taka kan hman mek hi palzutna a nasa ta em em a. RTI zawhnain Chief Minister leh Minister te dawhkan a thleng ta zel niin a lang a, Minister ten an chhan mai loh avanga RTI zawhna a huna chhan hman loh pawh a awm ta nual a ni,” tiin J. Malsawmzuala chuan a sawi.
A sawi zelnaah, “ Hei hi a pawi tak zet a ni. RTI zawhna pakhat Chief Minister Office atanga an chhanna phei chu a official lo hle a, bung tak takin RTI zawhna an chhang a. Hetianga RTI zawhna chhan chin hi a thinrim thlak a ni naran mai lo a, thuneihna hman sualna leh dan palzutna a ni. Sim se a tha hle," a ti.
