MNF chuan thuchhuah siamin SASCI scheme chu India ram state zawng zawngte infrastructure lama hmasawnna atana a pung awm loa kum 50 hnua rulh tur loan a nih thu tarlangin, state tinten sum hmuh that tumin an hmanhlel kumtin thin niin an sawi a. Tun thlenga Mizoramin SASCI sum an la hmuh loh chhan chu ZPM sawrkarin sawi fiah ngei se an tih thu an chhuah.
An thuchhahah hian MNF chuan kum 2023 kum tawpa ZPM sawrkar a lo pian atang khan SASCI ah harsatna khirh tak tak a awm nghal niin an tarlang a. Kum 2024-25 ah sanction sa Rs. 23,331 lakh an ti lapse vek a, kum 2024-25 ah Rs. 11,152 lakh an ti lapse leh niin an tarlang bawk a. Kum kal mekah sawrkar kum chanve kan hmang zo tawh chungin Mizoram sawrkar chuan SASCI 2026-27 atan cheng khat mah sum a la hmu lo tih RTI zawhna ni 1.10.2026 a Department of Expenditure, Finance Ministry-in a chhannaah chiang taka sawi lan a ni tih an tarlang.
ZPM sawrkara CM leh FM nihna chelh kawptu Lalduhoma chuan sawrkar sum enkawl dan a thiam lo mai ni loin pawisak nei miah loa Central sawrkar sum tam tak a hmanna tur taka hmang nghal loa hlawhah leh thil danga a hman hmasak zel thin vanga SASCI-a harsatna hi lo thleng ta niin a lang an ti.
Mizoram sawrkar chuan kum hmasa lamah pawh SASCI sum a taka pe chhhuak si loa UC a siam mai thin chu pawi an tih thu MNF party chuan an chhuah a. Tun hnuah chuan an vil tlat dawn tih tarlangin, sawrkarin sum pe chhuak loa UC a siam leh a nih chuan Central sawrkar-a a thlenna turah an thlen zel dawn tih an tarlang a ni.
Kumin sawrkar kumah hian thla 6 zet a liam tawh a, North East state dang 7 ten SASCI sum vaibelchhe sang bi an hmuh vek tawh laia Mizoramin dere pawh kan la hmu ve lo chuan ZPM sawrkar sum enkawl danah thil dik lo lian tak a awm tih a chiang tiin an thuchhuahah hian an tarlang a. MNF party chuan CM leh FM ni kawp Lalduhoma chuan sawi fiah ngei se an tih thu an tarlang a ni.
