Mizoram Pradesh Youth Congress Committee (MPYCC) chuan vawiinah khan thuchhuah siamin, ZPM Thalai chu mipat hmeichhiatna kawnga pu ber a him loh thu a thawhpuite ngeiin an sawi mam pui a, AMC Fund leh Scheme dang hre turin lehkha zir nawn leh rawh se an ti.
Congress Thalai thuchhuah chuan 30.9.2026 (Nilaini) a ZPM Thalaiin UD&PA in AMC kuta SASCI Rs. 5 crore a pek chungchangah Dr. Lalmalsawma Nghaka, XIX Corporator leh B. Lalawmpuii, Ward IX Corporator ten UD & PA Minister K. Sapdanga hnena thil awm dan an thlen chungchanga an thuchhuah chu Congress Thalai chuan atthlak an tiin, hetiang thuchhuah siam tur chuan thil nihphung hrethiam tura lehkha zir nawn leh turin an ngen tih an sawi a ni.
MPYCC chuan 29.9.2026 (Thawhlehni) a Dr. Lalmalsawma Nghaka, XIX Corporator leh B. Lalawmpuii, Ward IX Corporator ten UD & PA Minister K. Sapdanga hnena thil awm dan an thlen hi Ward Fund ni loin UD & PA in AMC kuta SASCI Rs. 5 crore a pek chungchang a nih zawk thu an sawi a. UD & PA Department in SASCI sum atangin cheng vaibelchhe 5 Aizawl Municipal Corporation ah a pe a, hei hi Aizawl khawpui chhunga tui luan kawr siamna tur (Composite Work Drain) a ni an ti.
AMC hian Aizawl khawpui chhung Ward hrang hrangah a sem darh a, amaherawhchu, Ward No. XIX leh Ward IX ah he sum hi dah a nih ve loh avang leh K. Sapdanga department chan UD & PA hnuai atanga sum awm thei ang ang rualkhai taka pe ve ngei turin an ngen mai a ni an ti a. Hemi hrethiam lo khawpa politics tui nu bual at leh an pute thil pawi tih sawi mam ringawta hun khawhral lo turin Congress Thalai chuan ZPM Thalai chu an chah thu an sawi.
MPYCC chuan SASCI sum hi ZPM pawisa a ni lo a, mipui sum, rulh leh ngai loan a ni a, hemi rulh lehna tur atan pawh hian Ward XIX leh Ward IX mipuite pawh sawrkara chhiah chhung lut turte tho an ni an ti a. Hetianga mipui sawrkar zuar si a, sawrkar hnua thliarkar rilru an pu leh si hi Mizoram tana sawrkar tha an ni lo a, ZPM Thalaite pawh hian fund awmzia hre turin an pu ber mipat hmeichhiatna kawnga a fihlim lo nia a thawhpuite ngeiin an sawi, sawi mama hun khawhral loa lehkha zir nawn leh turin Mizoram Congress Thalai chuan a hriattir a ni an ti bawk.
