BJP Mizoram chuan vawiinah khan political session neiin, inkhawm hi H. Malsawmtluanga, State Yuva Morcha Vice President in a kaihruai a, Delson Notlia, State General Secretary in thu a sawi.
Delson Notlia, MDC & State General Secretary chuan thu sawiin, "Mizoram awmna hi India rama hmun pawimawh tak mai pakhat a ni a, a chhan chu international border-a kan awm vang a ni. Hemi avang hian ram dang atanga ruihhlo tawlh ruk hi tun hma sawrkar atang tawhin a hluar em em a, Mizoram sawrkar leh NGO te chuan theihtawp chhuah thin mah sela duh ang taka hmalakna kalpui a har hle a ni,” a ti.
“He thil thleng hi hriain Union Home Minister Amit Shah chuan Operation Trident a kalpui a, hmanni lawkah Assam, Mizoram leh Manipur lamah ruihhloa inhnamhnawih te chu an account te an freeze sak a, chu mai ni loin henga mawhphurtute pawh an man bawk a. Chung an man te atang chuan tute nge inhnamhnawih tih pawh an la chhui chhuah zel pawh a beiseiawm a, hetianga central hmalakna a hlawhtlin theih nan hian Mizoram sawrkar Police Department te nena thawh hona tha tak a awm vang tih pawh a hriat a, vawiinah hian BJP Mizoram hmingin lawmthu kan sawi a ni," a ti.
A sawi zelnaah, "Mi thenkhatte'n dan loa sumdawnna avangin sum leng vak a tam ti te an awm thin a. Nimahsela, kan ngaihtuah chian ngai chu dan loa sumdawnna kalpuitu smuggler te hian an sum neih dah that nan in hmun lo ram te to tak takin an lei a, sawrkar hnathawk pension hnua in leh lo din beiseitute pawhin tunah chuan an nei hlei thei ta lo a ni. Tin, kan economy pawhin a that phahna a awm lo a, mi hausa leh rethei kar a tih zauh phah hle zawk a ni. Chu vangin, Narcotics Control Bureau (NCB) te leh Enforcement Directorate (ED) te hmalakna hi state sawrkar mai bakah Mizo mipuite pawhin kan ram tan a ni tih hria a kan thlawp tlat a ngai a ni," a ti.
