2-Dampa Assembly Constituency (ST) MLA Dr. R. Lalthangliana chuan a bial chhung Kanghmun, Lungphun, Hreichuk, Khawrihnim, West Lungdar leh Reiek te tlawhin hun a hmang a, khawtlang hruaitute leh MNF hruaitute nen inkawmhona hun tha tak an nei.
Dr. R. Lalthangliana chuan, “ZPM sawrkarah vawi khat pawh Minister la ni ngai lo Chief Minister a ni a, MLA la ni ngai reng reng lote an Minister nual a, an kal dan hi an ar khaw thim dai mai mai a ni. Campaign laia tih tur an tiamte kha a takin a lo tih theih leh si loh a, an sual vang ni loin a ngaihna an hriat loh vangin tunah hian harsatna nasa tak an tawk mek tih pawh mipuiin kan hria a ni. Keini chuan term hmasaa SEDP kan tih aia tha leh fun kim zawk, mi thiam rual 20 chuangte nen kan duang mek a ni. Kan au hlaah hian a taka kan thil tih ngei ngei tur chauh kan sawi tih lo hria ang che u, kan tih loh tur kan zuar ve dawn lo,” a ti.
MNF Policy and Programme Committee Chairman ni bawk Dr. R. Lalthangliana chuan kum 2028 ah sawrkarna an chelh huna hma lak dan tur tlangpui an duang zo tep tawh tih sawiin, ram mipui mamawh sukthlek hre chiangin hmachhawp an siam tih a sawi a. Mizo thalaite eizawnna tur Youth Policy thar an buatsaih a, thalaite thawh tur bik awmze nei taka buatsaih a nih thu a sawi.
"Kut hnathawktute tana chhenfakawm tak ruahmanna kan kalpui dawn a, khawpuia cheng, a bikin mi harsaten lei rem an rah theihna tur atan ruahmanna thar kan siam dawn a, thingtlanga chengten eizawn nana an hman leh din chan puina tham tur rural policy thar ruahman a ni ang," a ti.
Health Minister hlui chuan, "MNF hi health care siam chhuaktu architect kan nih hre rengin, changtlung leh zual, mi harsa leh rethei berte chhawr tangkai theihin kan buatsaih ang. MUHCS hi Health Minister ka nih term tawp dawn a ruaiah notification kan chhuah hman a, ZPM in min chhunzawm sak hi lawmawm ka ti a. An kalpui dan erawh duh thu a sam lo thung a ni. Sawrkar hnathawk leh pensioner te, a duh leh duh lo thliar loa vai hma vek ringawt ang chite hi keini chuan tha kan ti ve lo. Hmuh hmaih a la tam riau a, YMA leh VC/LC te pawhin an ngaih pawimawh leh tul an tih bik ngawih ngawihte tan, a bika ruahmanna siamsak pawh tul kan ti a, chungte chuan tangkai taka an hman theih turin kan sawrkar leh hunah kan kalpui ang," a ti.
“Mipui mimir mamawh bik, buhfai, tui, electric, gas leh mamawh dangte chu mipui tana hnianghnar zawk leh phurrit siam lo zawngin kan kalpui ang a. Forest Conservation Amendment Act (FCAA) ZPM sawrkarin Assembly rorelnaa a lo adopt tawh hi kan sut leh ang. Inner Line Permit hi khauh taka kalpuiin a tihchak nan Committee/Board kan din ang a, FCAA hi kal tlangpui a nih lohna turin MNF chuan hma kan la zel ang a. India ram hmun hrang hranga kan unau Kristian tihduhdah tuartute thlavang na takin kan hauh zel ang," a ti a ni.
