Mizoram Merchant Association (MIMA), General Headquarters chuan Mizote ei leh bar zawnna kawnga chimral kan nih loh nan tih tak zeta hma lak an tum thu sawiin, MIMA ECM leh MIMA Action Committee chuan MIMA Office, New Market-ah joint meeting an nei.
Joint meeting chuan hma an lo lak tawh dante thlir hoin, tih tak zeta hma lak chhunzawm zel a nih loh chuan Mizote hi ei leh bar zawnna kawngah chimral kan ni chho zel nia hriain, theih tawp chhuaha hma lak dan tur an rel.
Aizawl khawpui chhunga Local Council (LC), MUP leh MHIP te ngenna lehkha pein, an huam chhunga hnam dang dawrkai, sumdawng leh Mizo hming hawha hnam dang sumdawng awmtir lo tura ngen mai bakah, dan dik loa sumdawng an awm loh nan Committee din tura ngen ni se an ti a. MIMA Action Committee in hma lakna a nei a nih pawha lo thawhpui tura ngen ni bawk se an ti.
Central YMA, MZP leh MSU te hnam dang dan loa sumdawng, Mizo hming hawha sumdawng, supplier te hma lakpui tura meeting neihpui ni se an ti bawk.
Mizoram Home Minister hmuh a, ILP khauh zawka kalpui tur leh ILP checkgate a duty ten Mizoram tlawh tur ILP an pekin an rawn zin chhanah ‘Business’ ti tawh lo tur leh shop helper anga ILP pe tawh lo tura ngen ni se an ti a. Mizoramah ‘business’ anga ILP pek hi dan bawh chhiatna a ni tih sawiin, shop helper ILP hmang hian hnam dangin Mizo hming hawhin, anmahni dawr an nghak nasa hlein MIMA chuan an hria a ni.
MIMA Action Committee chuan hnam dang dan loa sumdawngte tihrem an nih theih nan theih tawp chhuaha beiha check thin ni se an ti a. A tul angin Aizawl chauh lo hmun dangah pawh hma lak zel an tum a, MIMA Action Committee hmalakna hi Mizo mipuiten lo thlawp turin an ngen bawk a ni.
