Education Minister Dr. Vanlalthlana chuan vawiinah khan a pisaah chanchinbu mite kawmin Mizoram State University-a thawk tur Group D hna lakah thu dik loa beihna an tawh nasat thu sawiin, merit list-a pakhatna court-ah kal a tum thu a sawi.
Mizoram State University (MzSU) Group D hna lak chungchanga chanchinbu mite zawhna chhangin Minister chuan hna lak chu merit list-a lak an ni tih sawiin, merit list-a pakhatna an chhungte chu court-ah kal an tum tih thu a sawi a. “Kan chhungte an nih avanga merit-a an tlin miau chuan lak loh chhan tur a awm lo,” a ti.
Dr. Vanlalthlana chuan MzSU atan post 71 siam a ni tawh tih sawiin, post 21 lak phalna neih a nih tawh thu a sawi a. Hna lak kal lai mek LDC post 2, driver post 2, despatch rider post 1 a awm thu a sawi bawk.
Minister chuan Mizoram State University Bill hi March ni 4, 2025 ah khan pass niin Aizawl-ah headquarters dah tura tih a ni tih a sawi a. Remchan zawkna avangin Lungleiah sawn niin February, 2026 a Mizoram State Assembly session-ah pass leh a nih thu a sawi.
MzSU dinna tur hian VC leh Registrar lak tum a nih laiin nominee zinga mi a inhnuhdawh avangin Search Committee din thar leh a nih thu Minister hian a sawi a. Tunah hian VC leh Registrar la tura hma lak leh mek a ni a ti.
Minister chuan, “Lunglei lamah MzSU building luah tur hi kan ngaihven tawh a, thla lehah chuan kan tih fel theih kan ring a, finance-in pawisa min pe tawh a, building luah tur kan neih ve leh kan insawn phei dawn a, hna lak pawh hi chak leh zuala kalpui kan tum,” a ti.
