Central Cockroach Janta Party (CJP) leh Mizoram Cockroach Janata Party te chuan October 29, 2026 zanah khan Zoom meeting an nei a. He hunah hian CJP National hruaitu Abhijeet Dipke (National Convener), Ashutosh Ranka (Co-Convener), Aafreen Nawaz (National Secrectary), Mehr Pasricha (Head of CJP policy division), Ankit Bhardwaj (Head In-charge for North-East Zone) leh Central hruaitu dangte bakah NE state CJP hruaitu dangte pawh an tel a. Mizoram atangin CJP State Represantative te, State Represantative to National te leh Executive Committee Member te an tel bawk a ni.
CJP Head In-charge for North-East Zone, Ankit Bhardwaj chuan he hun hi kaihruaiin, CJP National Secretary Aafreen Nawaz chuan hun rei tak lo kal an chak tawhna hmun, Mizoram chu Delhi chungchangah an la buai em avanga an lo kal lawk theih loh thu sawiin, an lo kal vat dawn thu leh chumi tur chuan inpuahchahna pawh a kal mek thu a sawi.
CJP Co-convener Ashutosh Ranka pawhin thuchah tawi leh fuihna hun hmangin, “India ram hmun hrang hranga thalaite kan harh thar hi a lawmawmin, Mizoramin nasa taka min thlawpna kan dawng hi kan lawm hle a ni,” a ti.
Mizoram CJP aiawhin State Representative to National, Muani chuan Mizoram CJP hma lak tawhnate leh thalaite harsatna tawh hrang hrangte sawiin, “India ram thalaite thawh hona tha neih a, hma lam hun atana tanrual a, beih ho a ngaihzia a sawi a. MPSC hna lak chungchangah thalaiten harsatna an tawh nasat zia leh MPSC hna lak dan fel tawk loh zia kimchang takin a sawi bawk.
Muani chuan kan ramah induhsakna uchuak vanga thalaiten an chanvo pawh an dawn that theih loh thu leh, tun hnaia State University hna lak chungchangah dik lo leh felhlel deuh a awm nia an hriat an au chhuahpui chungchang sawiin, central lam hruaitute pawhin rawn ngaihven turin a ngen a ni.
Central CJP hruaitute chuan hma lam pan a hmalakna nei ho zel turin Mizoram State CJP te chu an chah a. Central CJP-in Legal Team an neih thu leh a tul chuan nasa zawka beih ho an huam reng thu leh an tanpui tur thu an sawi a. Zau leh awmze nei zawka thawhhona a awm theih nan ziaka report mumal tak thlen turin CJP Mizoram te chu an ngen a. Mizorama an rawn kal tur thu sawiin, theihtawp chhuah an inhuam thu an sawi bawk a ni.
