Mizoram Pradesh Youth Congress Committee (MPYCC) chuan thuchhuah siamin, Higher & Technical Education Minister Dr. Vanlalthlana’n college zirtirtute zingah thawk tha leh tha lo tehna kalpui a nih dawn thu a sawi chu thil zahthlaka an ngaih thu an tarlang a. Minister chu amah inen fiah hmasa tura an duh thu an tarlang.
Congress Thalai thuchhuahah hian Higher & Technical Education Minister Dr. Vanlalthlana chuan 28.10.2026 (Nilaini) a a pisaa chanchinbumite a kawmnaah Mizoram State University building pawh la awm hma hauha Group D staff bik hmanhmawh taka a lak chungchang a sawi fiah tih an tarlang a. Hetah hian Dr. Vanlalthlana chuan college zirtirtute zingah thawk tha leh tha lo tehna (Faculty assessment) kalpui a ni dawn tih a sawi a, hei hi thil zahthlak tak nia an ngaih thu MPYCC chuan an tarlang a. College zirtirtu thawk tha lo a teh dawn a nih chuan amah inen fiah hmasa ber tur leh tha takin a thawhna Pachhunga University College-ah class la tawh turin an phut a ni.
Social media lamah ZPM Marini tihin Facebook Lawrkhawm Group-ah Dr. Mathlana hna lak dan chungchanga DEO pakhat thusawi tia post siamin, Aizawla veng pakhat DEO in Dr. Mathlana chungchang a sawi, “Govt. Mizo Higher School-a Botany casual teacher an lak tuma Dr. Vanlalthlana laina hnai tak, an in atanga pasal nei fanu hi 4-na a ni a, an chhungte a nih thu min hrilhtu an awm avang leh an mark a inhnaih avangin 1-na zawk aia dah kan tum,” tih a sawi chu thil rapthlak a nih thu MPYCC thuchhuahah hian an tarlang a. Hetiang thil dik lo, midang chanvo chhuhsak pawisa lo DEO hi zawng chhuak a hremna pe turin Congress Thalai chuan an phut tih an sawi.
