Larsap chenna, Lok Bhavan hmar lam gate duty, Sudhir Swami, kum 31 mi chu vawiin chawhma dar 10:20 velah khan a duty-na hmunah a silai ken, AK 47 in a inkap hlum.
Police hotute sawi danin, Larsap chenna, Lok Bhavan vengtu, CRP 225 Bn zinga mi, Sub-Inspector (General Duty) Sudhir Swami chu Lok Bhavan hmar lam gate-a sentry post-a duty, chair-a a thut laiin, a service silai, AK 47 hmang hian a kaah inkapin, a tukhum leh a chhip inkarah a tlang chho a. A inkah hun tak hriat theih loh mah se chawhma dar 10:20 bawr vel nia hriat a ni a. Thil thlen hnuah hian rang takin Police hriattir an ni a, FSL-te a hmuna koh niin, niminah khan Civil Hospital, Aizawlah a ruang endik a ni.
Sudhir Swami hi Jaipur, Rajasthan mi a ni a, Police hotute chuan amah leh amah a inkah chhan an hre lo a, a silai bakah mobile phone te lain, an chhui zui tih an sawi a. He thubuai hi Aizawl Police Station-in buaipuiin, suicide unnatural death thubuai ziah luh a ni an ti a. A ruang hawpui dan tur chu CRP hotuten an buaipui tura an ngaih thu an sawi.
Inkap hlum Sudhir Swami hi nupui fanau nei lo a ni a, nikum velah khan 225 Bn F Company-ah hian an rawn dah nia hriat a ni a, Mizoramah kum 1 vel chauh a la awm hman a ni.
Sudhir Swami ruang hi naktukah an khua Jaipur district, Rajasthan panpui tum a ni.
