MNF PAC member Er. K. Lalsawmvela chuan sawrkarin Finance Department kal tlanga pensioner leh family pensioners kum 60 chung lamte khawlaia intlar put ngai khawpa an ko khawm chu intham lohnaah an ngaih thu a sawi a, pensioner te laka hma an lak danah hian ngaihdam dil turin MNF chuan ZPM sawrkar an phut thu a sawi bawk.
Er. K. Lalsawmvela chuan November 2026 chhunga an Aadhaar card kenga Treasury Officer hnenah anmahni ngei inlan tura tih an nih avangin pensioner kum 60 chin chung lam ni vek tawh, a then phei chu tar chak lo, tiang hawl ngai tawhte nen lama khalh khawm luih an ni tih a sawi a. Hetiang thil hi engtik lai maha Mizoramah emaw, state dangah pawh la thleng ngai lo, khawvel hmun dang pawha la thleng ngai lo a ni a ti.
PAC Member chuan pensioner te awlsamna tura ruahmanna tinreng central sawrkar pawhin a chhawp chhuah mek lai leh, state dangte pawhin pensioner te awlsamna leh zangkhaina tur hawi zawnga chak taka hma an lak mek laia ZPM sawrkarin pensioner te ringhlel ni awm fahrana an chanvo ni sa reng an hmuh chhunzawm theihna tura zing kar hma tak atanga thui tak tak kawngpui dunga intlar ngaia a siam hi hmuh hrehawm a tling a, an dikna chanvo palzutna rapthlak tak a ni a ti.
An that lai hun zawng zawng sawrkar tana lo hmang tawhtu pensioner te hi ram tan an hlu a, zah leh chawimawi an phu tehreng nen ZPM sawrkarin ka theih tak emaw tia ni sen sa leh boruak lum tak hnuaia ‘physical parade’ a neihtir mai hi Zoram mipuite tan engti zawng maha ngaihdam theih chi a ni lo a ti bawk.
Pensioner ten mahni in lum atanga awlsam taka Digital Life Certificate an thehluh theihna turin kum eng emaw chen kal ta atang khan central sawrkar phei chuan ram pum huapin beihpui a thlak niin Er. K. Lalsawmvela chuan a sawi a. Pensioner ten awlsam taka Digital Life Certificate an lak zung zung theihna tura a bika digital platform duan ‘Jeevan Pramaan’ leh kawng dangte duansakin, pensioner te tan hma a la mek zawk tih a sawi. Digital Platform ban phak ve rih lote pawhin awlsam taka Life Certificate an lak theihna turin, hmun hrang hranga sawrkar officer hrang hrangte leh MP/MLA/VC te thuneihna pein, an awlsamna tur hi nasa takin a dappui reng zawk a ni tih a sawi.
Er. K. Lalsawmvela chuan Ministry of Personnel, Public Grievances & Pensions bul tumin ‘Digital Life Certificate’ campaign chu tunah pawh ram pum huapa thlak chhoh leh mek a ni a ti a, tunlai thiamna changkang, ‘face authentication technology’ an tihte nen, smart phone hmang pawha pensioner ten ‘Digital Life Certificate’ an update zung zung theihna tur kalpui mek a ni a, pensioner harsatna neite pawh anmahni chenna in ngeia kal chilh a tanpuina (Doorstep service) pek zung zung an nih tawh laia ZPM sawrkarin pensioner te chunga dik lo taka ro a rel ta mai chu MNF party chuan eng lai maha an tih ve loh tur a nih thu a sawi a ni.
Dik lo taka pension la an awm lohna tura hma lak chu sawrkar tih tur pangngai a ni tih sawiin, chumi atana technology changkang tinreng central sawrkar pawhin a chhawp chhuah tawh laia ZPM sawrkarin an awlsam na tur chauh thlira pensioner te chunga dan piah lama kherkhiap taka ruahmanna an siam khum ta chu rang taka titawp tur leh pensioner te lakah ngaihdam dil turin an phut tih a sawi bawk.
