Mizo National Youth Front (MNYF) Headquarters chuan vawiinah khan Operation Enchhinna an kalpuinaah Health & Family Welfare Secretariat-ah RTI zawhna 109 an theh lut a. RTI zawhna hi SPIO H. Lalthazuala chuan a lo dawng.
MNYF in thuchhuah an siamah, ZPM sawrkarah mipuiin RTI an rin zawh tawk lohna tur khawp thil thleng hriat tur a tam thu an tarlang a. Chief Minister Lalduhoma ngei pawhin a dawt sawi hliah khuh nan ‘RTI chu a changtu Minister ten an enpui loh chuan a dik lo ve thei’ tiin House-ah hial a sawi chhuah thu an tarlang bawk.
Chief Minister chuan kum tam tak sawrkar hna lo khawih tawh SPIO leh officer te chu Minister tel loa RTI chhang dik thei loah a chhuah a nih ber thu tarlangin, mipuiin sawrkar hmalakna an hriatna hmanraw pawimawh tak, lang tlang sawrkar tha a awm theihna atana pawimawh berte zinga mi RTI rin zawh tawh loh chuan sawrkarin mipuite laka zep duh a ngahin, lang tlang nih an hlau hle tawh tihna a nih thu an thuchhuahah hian an tarlang.
MNF Thalai chuan ZPM sawrkar hnuaiah RTI zawhna chhan mumal loh, chhan dik chiah loh leh chhan duh loh te, RTI thuneitu sang zawka zualko ngai tih te hriat tur a awm fo niin an thuchhuahah hian an tarlang a. RTI chhanna tur pawh SPIO ten mahni thua an chhan hmain Minister te pawmpui hmasak a ngai ta hial niin an tarlang bawk a ni.
An thuchhuahah chuan SPIO te pawhin harsatna nasa tak an tawk niin an tarlang a, Mizorama thil la thleng ngai lo, State sawrkar ngeiin Mizoram State Health Care Society kal tlanga ama hnuaia mi State Information Commission pawh court-ah hial a khing ta mai chu kalphung thar tiamtu ZPM sawrkarin lang tlang nih an hlauhzia tichiangtu a nih thu an tarlang a ni.
Lang tlang sawrkar a awm theih nan MNYF chuan nasa taka hma lak an tum thu an tarlang a. Tunah hian Department hrang hrang zawhna tur RTI zawhna 500 chuang an buatsaih fel tawh tih tarlangin, Health & Family Welfare Department atangin RTI zawhna 109 in bul an tan dawn a, thla 2 vel chhungin Department dang zawng zawng pawh zawh fel vek an tum a ni.
Thuchhuahah hian ZPM sawrkarin RTI zawhnate chu a hun takah, dik tak leh fel taka chhan an beisei leh an phut thu an tarlang a. RTI chhanna buatsaihtu SPIO leh Department hotute pawh kut phuara awm loa, zalen taka dan anga dikna nen chhanna an pek theih zel an beisei tih an tarlang a ni.
