Central YMA office bearer te chuan vawiinah khan Home Minister K. Sapdanga chu a pisaah hmuin, tun hnaia Mizoram Police, Narcotics Control Bureau (NCB) leh Enforcement Directorate te tangkawpin hlawhtling taka ruihhlo kaihhnawiha hmalakna beihpui 'Operation Trident' an kalpui avangin lawmthu an hrilh.
Operation Trident hlawhtlinna tura thawktu zawng zawng chungah CYMA hruaitute chuan lawmthu sawiin, "An hmalak chhunzawm zelna turah pawh Central YMA chuan puih a inhuam reng a ni. CYMA chuan kan ram leh khawtlangah ruihhloin harsatna a thlen mek laia, sum leh pai itna avanga hemi kawnga inhnamhnawih mi eng emaw zat man chhuah an ni hi lawmawm kan ti tak zet," an ti.
CYMA chuan YMA chu 'Ruihhlo Do' kumpuana hmangtu an nih angin ruihhlo dona kawngah a tul ang zela sawrkar thuneitute nena tangkawpin theihtawpin hma an la zel dawn tih sawiin, hemi kawngah hian mipuite tawiawm pawh an ngen nghal a ni tiin, ruihhlo hmanga sumdawngte leh eizawnna atana hmanga inhnamhnawihte chu kan ram hmelma an ni tih hre thar leh turin mipui an chah a ni.
Home Minister K. Sapdanga chuan Operation Trident hnuaiah ruihhlo tawlh rututen hlawhfa an rawihte chauh ni lo a, ruihhlo tawlh rutu ber, a meizanghlaptu an hup theih tak avangin Mizoram tan a vanneihthlak hle a ti.
K. Sapdanga chuan Operation Trident hlawhtlin lawmna Central YMA hruaitute nen an nei thei chu lawmawm a tih thu a sawi a. Operation Trident tia Ministry of Home Affairs-in beihpui a rawn thlak chu Mizoram tan a vanneihthlak tak zet a, a inhmeh em em bawk a ti a. He Operation hi a tawpna a ni dawn lo a, a bul tanna tur a ni a ti.
He ruihhlo hnuk chhu chat tur hian YMA ten beihpui an thlak chhunzawm zel ang tiin Home Minister chuan a sawi a. An hmalakna chu a chhuanawm ti zawnga ngaihtuah lo tur leh Mizo thalaite nun engzat nge chhanchhuah a nih tih te, ruihhlo laka la fihlim thalai engzat nge an venhim tih te, chhungkaw engzat nge an buaina an pumpelhtir tih te, mipui engzat tan nge boruak ralmuang an siam tih te, dan bawhchhiatna engzat nge an tihtawp tih te, rim taka thawktu NGO, CADS, Excise leh Police te hahna engzat nge an chhawk ti zawnga ngaihtuahin lawmawm a tih thu a sawi.
Tlawmngai pawlte nen tangruala Operation Trident hmanga ruihhlo tawlh rukna survey an neiha man tul nia an hriat hmun 38 chu ruahman ang takin an hup fai vek niin a sawi a. Tun dinhmunah Mizoramah ruihhlo a van pharh tawh an rin thu sawiin, tun hma chuan ruihhlo tawlh rututen hlawhfa an rawihte an man thin a, tunah chuan ruihhlo tawlh rutu ber, a meizanghlaptu an hup theih tak avangin Mizoram tan a vanneihthlak hle a, thil lawmawm tak a nih thu a sawi a ni.
