Association of Tour Operators Mizoram (ATOM) chuan thuchhuah siamin, tun hnaia thu belh chian dawl lo hmanga Mizo hnam demna, deusawhna leh boruak chawk buai thei zawnga thu sawitu Surita Chakma leh a agency chu member an nihna atanga an paih thu an tarlang.
ATOM thu chhuahah chuan Surita Chakma-in thu belh chian dawl lo hmanga vantlang hmuha Mizo hnam demna, deusawhna leh boruak chawk buai thei zawng thu a sawi chu pawi an tih thu tarlangin, an dem tak zet tih an tarlang a. Mizoram tourism sector aiawhtu pawl an nih angin ATOM chuan hnam zia humhalh, inzahtawnna leh hnam inkar boruak muanawm vawn him chu an ngaih pawimawh berte zinga mi a ni tih an tarlang bawk.
An member te chu ram aiawhtu pawimawh tak te an nih avangin hnam zia leh ro hlute hmuhsitna, Mizo hnam deusawhna, ram mipuite inlaichinna tichhe thei zawnga vantlang hmuha thi ltih emaw, sawi emaw reng reng chu hnam zia leh vantlang inkaihhruaina nen a inkalh tlat a ni tih an tarlang a ni.
Hetianga Mizo hming tihbawrhbanna leh tihhminghliauna chungchangah hian Executive Committee chuan thutlukna khauh tak a siam tih ATOM thuchhuahah hian an tarlang a. Memorandum of Association (MoA) Clause 4/B/a/v in thuneihna a siamsak angin Surita Chakma leh a agency MuroMuri te chu ATOM member an nihna atangin vawiin atanga paih leh tihtawp nghal a ni tih an tarlang a. Hemi rual hian ATOM chuan Surita Chakma leh a agency MuroMuri te nena inzawmna leh thawhhohna zawng zawng an chhu chat hlen tih an puangzar bawk.
Tourism leh Hospitality industry lama an thawhpuite, regional affiliate leh stakeholder dangte hnenah hriattirna tihchhuah nghal a nih thu an tarlang a. Hei hian industry chhungah lang tlang taka inpawhtawnna a siam bakah, an thawhpuite chu khualzinte leh stakeholder zawng zawng tana boruak muanawm, zahawm leh hnam zia inzahtawnna hmun buatsaih turin a pui dawn a ni an ti.
Tourism ecosystem himna leh hmasawnna humhalh zel a nih theih nan ATOM chuan Surita Chakma leh a agency MuroMuri tour operation license chu tihtawpsak turin Tourism Department, Mizoram sawrkar hnenah ngenna an thehlut a. Ram muanna, inpumkhatna leh hnam zahawmna tibawrhbang leh tichhe thei zawnga tourism kaihhnawiha chetna a awm a nih chuan ATOM chuan a en zui reng dawn tih an tarlang.
Mizoram tourism stakeholder zawng zawngte chu hnam zia, Zo nun ze mawi leh inzahtawnna vawng nung zel turin an ngenin an sawm bawk a. Mizorama tourism innghahna lungphum chu muanna, inpumkhatna leh khual tha thlenna a ni tih tarlangin, khualzinte tana boruak muanawm leh zahawm buatsaih tur te, Mizo hnam zahawmna leh ro hlute theihtawpa vawnhim a, chawimawi zel a nih theih nan ATOM chuan an din chhan chu nghet takin an hlen chhuak zel dawn tih an tarlang bawk a ni.
