BJP Mizoram chuan vawiinah khan "Save Democracy Remove Anarchy" tih thupui hmangin kawng an zawh a, Zarkawt Traffic point atanga zawh tanin, Vanapa Hall kawt thleng kawng hi an zawh a ni.
Zarkawt kawnah hun hmasa hmangin Vanapa Hall kawtah a kharna neih a ni a. He huna thu sawitu State President Dr. K. Beichhua, MLA chuan tharum hmanga sawrkar paih thlak tumna an do tlat thu a sawi.
Dr. K. Beichhua, MLA leh State President chuan, "Vawiina democracy humhimna kawngzawh leh tharum hmanga sawrkar siam tumna duh lohna lantira lo kal zawng zawngte chungah lawmthu ka sawi a ni. Vawiinah hian SIR hi Mizoramah pawh tha tak leh tluang taka kalpui a ni a, India ramah phei chuan a kalpui tha ber pawl State kan ni pha hial a ni. Mizoramah pawh hian he SIR kalpui a nih avang hian voter sing 3 chuang (3.89%) vel paih a ni a. Heng vote paih te hi a then chu hmun danga pem te, mitthi tawh leh hmun khat aia tama vote nei te an ni," a ti.
State President chuan, "Mizorama vote paih zawng zawng leh India rama vote paih zawng zawng belh khawma crore 13 ah hian BJP voter tam tak an awm ve a, Congress vote chauh paih a ni lo tih chu tu pawhin kan hriatthiam ka ring. Amaherawhchu, ram leh hnam hmangaihna avangin dan dik taka SIR kalpui a nih theih nan BJP chuan huaisen tak leh dik taka vote nei thei te chauhin vote an neih theih nan hma a la ta a ni. SIR hi BJP tih chhuah a ni lo a, Congress sawrkar hun laia an dan siam tawh a ni a, chutiang chuan India khua leh tui dik tak ten vote kan neih theih nan hma a la mai a ni,” a ti bawk.
A sawi zelnaah, “BJP a duhsak bik theih loh a, Congress party a huat bik theih loh tih chu BLO te hi a hre chiangtute an ni ang. Chuvangin, dan ang thlapa hmalakna hi Congress party leh a sangawi zawnpuite chuan dawt hmanga puh hmingchhiat an tum a ni. Vawiinah hian democracy humhima tharum hmanga sawrkar paih thlak tum hi kan do tlat a, democracy ang ngei a mipui duh thlanna hi kan zah tur a ni a, chutiang humhim chu BJP chuan kan tum ber a ni," a ti.
