Dan dik loa pension la zawn chhuah hna kal zelah Mizoram puma Treasury Office atanga pension la zinga mi 674 te chuan dan dik loin pension an la tih an hmu chhuak tawh.
Finance Department in pension dan dik loa la, mahni duh thu ngeia inhrilh hre tura an tih hun chhung, kumin July thla atanga September thla chhung khan Aizawl bakah District hrang hranga Treasury Office a pension dan dik loa la mi 674 awmin, a tam ber chu Family Pension la an nih thu Treasury Office hotute chuan an sawi a. Dan dik loa pension la mi 674 hmuh chhuah atang hian thla khatah cheng vaibelchhe 1.25 vel hum theih a nih thu sawiin, kum khatah cheng vaibelchhe 15.70 vel an hum thei dawn tih an sawi a ni.
Thuchhuah an siam angin Finance Department chuan sawrkara pensioner leh family pension la te anmahni ngei inlana en fiahna Treasury Office-ah kalpui mek a ni a. Heng bakah hian Task Force Team ten veng tin leh khaw tinah LC, VC leh YMA te nen tang hoin a hmunah kalin enfiah runpui an nei leh dawn bawk a. Tunah hian District thenkhatah chuan kalpui tan a ni tawh a, Aizawlah pawh kalpui thuai tum a nih thu Treasury Office hotute chuan an sawi a ni.
Tun dinhmunah hian Mizoram pumah pension la mi 27,070 vel an awm mek a ni.
