BJP Mizoram chuan vawiinah khan Aizawl Press Club-ah thu thar thehdarhtute an kawm a, electoral system tihchakna tura SIR 2026 kalpui chu Congress party leh opposition party dangten politics khelh nan an hmang nia sawiin, lungchhiatthlak an tih thu an sawi a. Naktukah hian Aizawlah 'Save Democracy, Remove Anarchy - Citizen for Democracy' tih thupuia hmangin kawngzawh an huaihawt dawn tih an sawi.
BJP Mizoram state General Secretary Delson Notlia chuan kum 1952 atanga kum 2025 inkarah SIR hi vawi 12 neih a nih tawh thu a sawi a. SIR 12 zinga 10 hi Congress sawrkar kaihhruaina hnuaia neih a ni tih sawiin, tuna Congress party leh opposition party te hian democracy humhalh tak tak an duh em tih chu an zawhna a nih thu a sawi. Political force thenkhat ten electoral process an ngaihtheih loh avangin democratic institution te tihchhiat an tum zawk em ni a ti bawk.
SIR hmalakna ber chu electoral roll-a thil dik lote zawn chhhuah leh siam that a nih thu sawiin Delson Notlia chuan hming inziak nawn, mitthi tawh hming paih, hmun danga pem hlen tawh te, voter record dik lo emaw, a hlui tawhte siam thatte a ni a ti a. BJP chuan nghet takin democracy hi a institution te a chak a, electoral roll te a dik a, mipuite mandate zah a nih chauhin a nung thei tih an ring tlat tih a sawi.
BJP Mizoram hruaitute chuan khua leh tuite chu fimkhur turin an chah a, democracy leh dan puiin a siam institution te humhim a, nghet taka ding turin an sawm nghal bawk a ni.
