Solid Waste Management Rules (SWMR) 2026 in a phut angin Aizawl khawpuia AMC Ward 7-ah bawlhhlawh chi 4-a thliar kalpui mek a ni a. Kumin December thla atangin Ward 12 dangah kalpui leh tura ruahman niin, nakkum March thlaah chuan AMC Ward tinah kalpui hman vek tum a ni.
AMC Executive Corporator R. Lalrodinga, Solid Waste Management in-charge chuan kumin September ni 17 atang khan AMC Ward 7 ah bawlhhlawh chi 4 a thliarna kalpui tan a nih thu leh tluang taka kalpui mek a nih thu a sawi a. A thawh hnihna hi December thlaah hian kalpui leh tur a ni a, tuna Ward 7 bakah Ward dang 12 ah kalpui a ni leh dawn a, nakkum March thlaah chuan Aizawl khawpui chhunga veng tin, Ward zawng zawngah kalpui vek kan tum a ti.
September ni 17 atang khan AMC Ward 7 ah hian in tina kala bawlhhlawh khawnna 'Door to Door Collection' kalpui a nih thu sawiin K. Lalrodinga chuan, in tina bawlhhlawh khawn pawh a theih anga kalpui a nih thu sawiin, veng lian zualah chuan a harsa deuh nia a lan thu leh veng te deuhah chuan tluang taka kalpui a nih thu a sawi a. Hei pawh hi nakkum March thlaah chuan Aizawl khawpuia veng tinah kalpui hman an tum thu a sawi.
Aizawl khawpui bawlhhlawh paihna Tuirial Solid Waste Management Centre-a bawlhhlawh hal ralna khawl chu a thara thlak turin ruahmanna siam a nih thu leh sawrkarah pawisa an dil mek thu a sawi a. Hualngohmun-a Solid Waste Management Centre thar tur sak mek leh Luangmual Industrial Growth Centre-a bawlhhlawh tawih thei lo sawngbawlna tur siam mek pawh November thla chhung hian en chhinna neih theih a nih an beisei thu a sawi bawk.
