Sub-District Hospital, Tlabung chuan thuchhuah siamin social media-a Surita Chakma-in Tlabung damdawi inah Chakma-te enkawlna kawngah dah pawimawh hmasak an ni ngai lo tia a puhna chu thu dik lo a ni tih sawiin, damdawi inah hnam leh sakhua thliar hranna a awm ngai lo tih an tarlang.
Thuchhuah chuan Tlabung damdawi inah hnam, chi bil leh sakhuana kawngah engtik lai mahin inen hranna a awm ngai loh thu sawiin, damlote reng reng an natna dinhmun leh a tul dan ang zelin enkawlna dik tak, zahna leh ngaihsakna a inang veka pek thin a nih thu an tarlang a ni.
Damlo harsa zawkte mamawh phuhrukna atan Hospital Poor Patients' Fund kalpui a ni a. He sum hi Mizo mipuite thawh khawm a ni deuh ber a, hnam leh sakhua thliar loa mamawhtu apiangte tana hman tura ruahman a ni. He fund atanga tanpuina dawngtu zinga tam zawk pawh Chakma hnam damlote an ni tih an sawi.
Kum 2024 atanga vawiin thlenga Poor Patients' Fund sum hmuh dan leh hman ral dan chu an tarlang bawk a. Sum hmuh zinga Mizo atanga hmuh chu Rs. 3,06,964 (97.29%) a ni a, Chakma atanga hmuh chu Rs. 8,530 (2.70%) niin, a vaiin Rs. 3,15,494 a ni.
Sum hman ral danah Mizo damlote tan Rs. 80,218 (26.81%), Chakma damlote tan Rs. 2,10,088 (70.21%) leh Bru damlote tan Rs. 8,903 (2.97%) hman a ni a. Poor Patients' Fund chu hnam thliar loa mamawhtu tan hman a nihzia a tilang tih an sawi.
Hnam bil leh chi bil anga inthliar hranna hi thil pawi tak a ni a, finfiahna tha tawk awm loa hetiang zawnga inpuh hmingchhiat hi thil pawi lehzual tak a ni an ti a. Thu dik loa inpuhna hian hun rei tak inrem taka lo khawsa ho tawh thinte inkarah inhriatthiam lohna leh rinhlelhna tha lo tak a thlen thei a ni an ti bawk.
Sub-District Hospital, Tlabung chu mipui zawng zawng tana damdawi in a ni a, damlo enkawlna hi thawktute rawngbawlna pawimawh tak a ni tih sawiin, damlote chu lainatna, zahna leh khawngaihna nena enkawl an ni thin a, hnam emaw sakhua emaw dah pawimawh hmasak a awm ngai lo tih an sawi a ni.
