ZPM General Headquarters chuan vawiinah khan party office-ah chhung inkhawm an hmang a. H. Zorempuia, Adviser chuan inkhawm kaihruaiin, hunserh hmangtu hi H. Lalsiamliana, Secretary a ni a. Lalmuanpuia Punte, MLA, Vice President, Adviser to CM (Political) chuan thu a sawi.
Lalmuanpuia Punte chuan Lamka, Manipur zin report pe hmasain, sawrkar hmalakna chi hrang hrang a sawi zui a, "Tun hnaiah Home Guard lak a ni dawn a, dik leh fair takin Home Minister-in a kalpui leh dawn a ni," a ti.
"Kan Sawrkar atang hian hna lak leh thil dang dang hi kan theih tawka mumalin kan kalpui. Party dang lo sawrkar tawhten an mi duhsak zawngte advertisement tel loa an lak vak vak ang kha an nghet hlei thei lo a, dan mumal lo deuha an lo la thin kha an khawngaihthlak letling hle a, chutiang chu keini chuan kan ti ve lo. Advertisement leh written test nen uluk takin hna kan la thin a, duhsak bik kan neih loh vangin kan party mite pawh an vui hial thin a ni," a ti.
Adviser to CM (Political) Lalmuanpuia chuan sawrkar department thenkhat hmalakna sawiin, "Pension dik loa la an rawn surrender avang hian sawrkarin kum tin crore 15 bawr vel a hum thei dawn a ni. Kawng engkimah kan sawrkar hian thil tih tak tak kan tum. Ruihhlo do kan han bei tak tak a, Operation Jericho-ah hian Police awm miah lohna khaw 13 ah Police kan dah a. CYMA-in theih tawp chhuahin sawrkar a thlawp a, khawchhak lama YMA Branch tlawh chhuakin, sawrkar hmalakna thlawp tura an tihnaah te hian CYMA chungah sawrkar a lawm hle a ni," tiin a sawi.
Vice President chuan, "Chief Minister leh Home Minister te, Excise Minister leh Social Welfare Minister te pheikhai rual takin an tang tlang a. Hnahthial, Khawzawl leh Lawngtlai-ah te tun hmaa narcotics lam Inspector hoa awm thin kha, tunah chuan Assistant Commissioner hoin an thu vek tawh. LESDE-ah hian cheng vbc 25-in ITI te sak that a ni a. Revenue Department chungchangah kan Minister-in tih tak takna nen a han beih chuan Maumual-ah ringawt pawh 456 lai Pass tihfel a ni a, Ramhlun lamah leh Zemabawk leh Chekbawk-ah te pawh tih fel a tam hle, hengte hi kan inchhuanna ni mai loin, tih tak takna nena hna thawk Minister kan neih vang a ni," a ti.
"Kan party manifesto puitlinna turin Budget Session neih hmasak berah ruang phurhna tur senso chu Budget-ah khung nghal a ni a. Opposition MLA te hlei hlei hi an phurrit kan sawrkarin a chhhawksak a, mi rethei zawkte tan zangkhaina a ni bawk a ni. Chutiang chuan Department hrang hrangah ngaihnawm tham, tum khata sawi zawh mai sen loh ZPM sawrkar hian a thawk mek zel a ni," a ti bawk.
