Mizo National Front chuan vawiinah khan chhung inkhawm neiin, he huna thu sawitu Robert Romawia Royte, MLA leh National Core Committee, MNF chuan MNF movement khan rah tha tam tak a chhuah tih sawiin, thangtharten MNF movement hlutzia an hre thar zel tih a sawi.
India Danpui hnuaia Mizo hnam leh sakhaw humhimna bakah ram neitu nihna leh ram chunga thuneihna thlengin Mizo mipuite kutah a awm tih a sawi a. Hetiang Danpui hnuaia thuneihna hi Nagaland state tih loh chuan India ram state dangin an neilo a ni a ti a. India Danpui Article 371G hnuaia inhumna hrang hrangte bakah inremna thuthlunga ILP tihnghehna te, MZU leh High Court bakah state puitlinga Mizoram hlan kai te pawh MNF movement rah chhuah vek a ni tiin, MNF party a kan awm hi kan vannei tih hre thar theuh ang u a ti.
Robert Romawia Royte chuan, “Bible-in dawt sawi a haw em em a, dawt sawitu chu ramhuai sual tiin a sawi hial a. Kan Chief Minister zahawm takin Assembly session chhung leh pawna dawt a sawi fo hi a pawi a. Keini MNF chuan thudik hmangin dawt hi kan hneh tur a ni. MNF te chuan sim ngai leh insiamthat ngaihna laia insiam thain, Mizoram chhunga mite leh State pawna hnam dangte thlengin sawrkar leh mai tura min beiseina hi tihlawhtling ang u,” a ti.
Hachhek MLA leh NCC member ni bawk Robert Romawia Royte chuan MNF sawrkar laiin Mizoram ramri tihzauha humhalh thar leh a ni tiin, Kanhmun thlang Mitdel lui te, Thinghlun bul leh hmun tam takah MNF sawrkar khan ram a zauhin luah hlen a ni tih a sawi a. Hnam party rorel laia sawrkar chet dan chu a chhuanawm a, ram mipui tan a thlamuanthlak em em a ni a ti bawk.
