Tukin dar 2 vela Bawngkawn leh Thuampui inkar kawngpuia tlangval insual buai kaihhnawiah Police ten mi 10 an man a, thubuai an siamsak.
Aizawl SP chuan thuchhuah siamin, tukin dar 2:00 vela Bawngkawn leh Thuampui inkara khawlaia tlangval insual buai chungchangah Bawngkawn PS ten hma an la nghal a. Hemi chungchangah hian an vaiin mi 10 man niin, heng mite lakah hian Bawngkawn PS-ah criminal case ziah luh niin, an vai hian man an ni tawh a, court-ah thawn an ni dawn tih an sawi.
Hetianga khawlaia insual buai ching lakah hian a na thei ang bera action lak zel tum a ni tiin Aizawl SP chuan a sawi a. Aizawl khawpui huam chhungah Police patrolling neih thin a ni a, mahse Police patrolling party awm remchan lohna hmunah hetiang thil thleng a awm a nih chuan a rang lamin 112 ERSS leh Police Station number a hnuaia tarlanah te hian hriattir thin turin mipuite an ngen a ni.
Thalai ten an hriat atana pawimawh chu Police-ah thubuai an neih chuan dam chhung criminal antecedent an nei dawn tih Aizawp SP chuan a sawi a. Chu chuan an hma lam hun zelah harsatna tam tak a thlen thei a ni a ti a. Hetianga intihbuaina hi thleng tawh lo se an duh a, a thleng a nih chuan na takin an chungah action lak a ni zel dawn tih a sawi.
1. Aizawl PS - 8794747291
2. Bawngkawn PS - 8794747292
3. Vaivakawn PS - 8794747293/6909316441
4. Kulikawn PS - 8794747294
5. Zonuam OP - 8794747295
6. Sialsuk PS - 6909316443/9366884087
7. Sairang PS - 6909316442
8. Darlawn PS - 6909316446
9. Sakawrdai PS - 6909316445
10. Seling OP - 7005994956
