Secretariat Conference Hall, MINECO-ah halpuah leh halmawi khuahkhirhna dan thar, ’The Mizoram Fireworks Regulation Act 2026’ kalpui dan tur inrawnkhawmna hun neih a ni a. K. Sapdanga, Minister, Home Department chuan thutkhawm hi kaihruaiin, Khilli Ram Meena, IAS, Chief Secretary, Sharad Agarwal, IPS, DGP, Home Department leh GAD hotute, Aizawl DC leh SP, Director I&PR, Central YMA, AMC leh MIMA hruaitute an tel a ni.
Thutkhawmah hian K. Sapdanga chuan Mizorama halpuah leh halmawi khapna dan kalpui tawh dan tlangpui a sawi a. Khuahkhirhna khauh tak kalpui aiin halpuah leh halmawi hal nghawng tha lo hrang hrang inzirtir paha hal lo tura inngenna siam chuan awmzia a neih thui zawk a beisei thu a sawi a. Ram nuam, fai leh thianghlim ni tura hma latu tlawmngai pawl pawimawh tak chu YMA te an nih thu sawiin, heng hmalakna a hlawhtlin zel theih nan sawrkar, kohhran, khawtlang, sumdawng pawl leh YMA te tanrual zel a pawimawh thu a sawi.
The Mizoram Fireworks Regulation Act 2026 sawi fiahna hun hi Vanlalmawia, IAS, Secretary, Home Department chuan a hmang a. Halpuah leh halmawi hal chungchang, kawl leh zawrh khapnate he dan hnuaiah hian awmin, a hremna hrang hrang pawh a chuang a. He dan kengkawh tura High Level Committee, District Supervisory Committee leh Local Supervisory Committee din dan turte a chuang bawk a ni.
He thutkhawmah hian The Mizoram Fireworks Regulation Act 2026 zau zawka mipui hnena thu thar la khawmtute, kohhran leh khawtlang hruaitute kal tlanga zirtirna kalpui dan turte sawi ho a ni a. Krismas vuakvet hmaa halpuah leh halmawi rawn lut tur danna kawnga Mizoram Merchant Association te nen tang hoa hma lak dan turte sawi ho niin, hal lo tura mipui hnena kawng hrang hranga ngenna siam dan turte an sawi.
