Mizoram Pradesh Congress Committee (MPCC) chuan vawiinah khan Aizawl Press Club-ah thu thar thehdarhtute kawmin, ZPM party sawrkarin Mizoram chu ba hmunah a siam mek tih an sawi.
MPCC Publicity Board Chairman PC Laltlansanga chuan ZPM sawrkar hnuaiah Mizoram leiba a pung nasa hle tih sawiin, kumina sawrkar budget aiin sawrkar leiba a tam zawk thu a sawi chhuak.
Kum 2026-27 budget zat chu cheng vbc17,076.92 niin, sawrkar leiba erawh cheng vbc 19,085.15 vel a ni a, leiba hi budget aiin cheng vbc 2,008.23 zetin a tam zawk a ti a. Mihring pakhat, nausen nen chhiar pawhin cheng nuai 1.45 vel leiba nei ang kan ni a ti.
Kum 2023-2026 chhung ZPM sawrkarna hnuaiah sum cheng vbc 18,911.51 puk a ni tawh tih MPCC chuan an sawi a, sawrkar leiba pawh cheng vbc 7,507.56 a pung tih an sawi bawk a. Kum khatah chawh rualin cheng vbc 6,876.89 sum puk leh cheng vbc 2,730.02 leiba a pung tih an sawi.
Congress sawrkar (2008-2018) leh MNF sawrkar (2018-2023) hun laia sum puk leh leiba pung zat nen khaikhinin ZPM sawrkar hunah kum khatah sum puk leh leiba pung zat a sang zawk tih MPCC chuan an sawi a ni.
Sawrkar leiba tihniam thuai tur leh sum leh pai dinhmun siam tha thuai turin MPCC chuan ZPM sawrkar an phut a. Restricted tender leh departmental works hmanga contract hna pek dan te pawh an sawisel a, sum puk chawp ringawt hmanga sawrkar kalpui zel lo turin an chah.
Khawlaiah sum leng vak a tlem a, sumdawngte an mangang a, sawrkarin sum tam tak a puk reng laia sum leng vak a tlem chhan sawi fiah turin ZPM sawrkar an phut thu an sawi bawk.
